其實創業同追女仔係有唔少共通點，趁得閒同大家分享下。
1. 實戰比準備重要。無論你係屋企對住塊鏡，襯左幾耐衫，Gel 左幾耐個頭，練左講笑話幾多次，你一日唔出街， 你一日都係無女。更重要既係，你未出街，連個女仔鐘意咩都未知，點準備呢？你練到好大隻，原來人地鐘意文青。你練到一手好結他，原來人地鐘意男仔打機叻。所以，幾時都係keep yourself in the market，然後慢慢就會有野返黎。
2. Aim high, then find an angle to start small。 身邊總有毒撚係一開始就想追校花，然後仲要話晒俾全班知，結果校花每次見到毒撚都搵路走。你身邊有無咁既朋友？
咁真正追到校花既男仔係點架呢？往往都係好subtle 開始，連身邊朋友都唔知。可能係一齊玩活動認識，又或者搵朋友介紹，然後慢慢係一班人食飯既時候坐佢隔離，再夜晚同佢wtsapp／傾電話，然後單獨約佢睇戲食飯。有一日，唔經唔覺，你就發現條衰仔拖住左校花隻手仔。到你問返佢，佢就會話你知，其實佢暗戀左校花好耐，不過無話俾大家聽。
創業其實都好似，如果你一開始想打一個好大既市場，但係你又無切入點就咁衝過去，一黎就表白，往往都係同毒撚既下場一樣，一臉灰。成功既生意/Project，往往都係有一個進程，一開始係得好少人留意到你，但係留意到你既客人都好鐘意你既product/ service （又返去第一點，你唔出街，連第一批客人都無）。然後隨住你既努力，有一日，你就發現你原來已經食左market 既一大部分，抱得美人歸。
切入點係好重要，切入點係好重要，切入點係好重要。亦即係一開始點approach 女神，令女神變成你朋友係好重要。只有做到朋友先可以繼續發展，連朋友都做唔到，就係咁先。同道理，你要做到starbucks 咁成功，首先係要開到第一間cafe 先。連第一間cafe 都未站得住腳，點變starbucks？
咁你思考既方向，就會由點樣整starbucks 出黎變成點樣營運一間cafe 小店。跟住就係，市面上咁多cafe，點樣做到一間有人鐘意而市面上未有／好少有既cafe 呢？呢個就係切入點了。呢個時候你心入面都係aim at startbucks （追到女神)，但係你關心既就係點樣切入個市場 (同女神做到朋友)。
其實仲有好多，有機會再講。創業同追女仔既本質其實係一樣 － 要去俘擄一個陌生人既心。:)