第二屆 「香港十大傑出創業青年選舉」及頒獎禮靈魂中的靈魂，一定是今屆的籌委會！

 
籌委會主席邱益忠(Gordon)說得很到位，一個橫跨兩年的活動究竟是什麼的概念？  有籌委followers 急升變知名KOL、有籌委由半創業變成全職創業、有籌委連仔都生埋…

以下為籌委會主席邱益忠於頒獎禮之講辭全文:

「
大家好，先多謝Phoenix、Instant同Kenny創辦咗十大傑創頒獎典禮，無諗過自己喺第一屆時嘅只係其中一位觀眾，但三年後嘅今日，我以第二屆籌委組嘅主席嘅身份同大家見面，有依個機會可以同各行各業嘅創業家交流，對我嚟講係一個相當寶貴嘅經驗。

多謝生產力局提供一個咁好嘅場地比我哋舉辦頒獎典禮，多謝我哋一班相當願意傳承嘅評審Support我哋，亦多謝一班籌委會成員百忙抽時間義務幫忙，出心出力！

籌備一個頒獎典禮係唔容易，特別係疫情令我哋依個頒獎典禮，前後用咗兩年時間先可以完成，究竟，兩年時間係咩概念呢？

兩年時間，已經足夠我哋嘅籌委成為咗各行各業嘅KOL，例如Tasha成為咗風水界KOL；Vinky依位媽媽KOL日日都見到佢出Event、Stephen亦穩坐葵青區補習界一哥、Tin兄同Phoenix嘅電視節目《創業軍師》，亦大大力推動創業氣氛，好開心見到我哋依一屆嘅籌委都獨當一面，我喺大家身上學到好多好多！

以下嘅時間我想Focus喺得獎者方面，佢哋嘅創業故事絕對可以激勵大家！

香港人聽到美斯，以為一定係講踢波，但陳泳豪話比大家聽，以後聽到美斯，一定諗起美斯音樂，因為疫情下佢用兩年時間，將5間分店變為27間，成為香港創業界其中一個神話！

以前我哋話女仔甩頭髮係一個「賭命行為」，但Teris完全無有怕，開咗全港第一間「治療女仔脫髮問題」嘅公司，而最緊要係佢喺YouTube 幫所有女仔發聲，名牌手袋絕對唔係奢侈品，係可以好好保值，幫你發達！所以一班老公唔想賭命嘅話，一定要科金比老婆買袋啦！

氹女朋友開心除咗買手袋外，買燕窩都係一種選擇，咁Aki兄創立「啖啖燕窩」依個品牌，唔止個名深入民心，而且貨真價實，喺疫情下闖出一條活路～

有人話，《全民造星》係捧紅咗一班本地明星，但我哋青年創業軍見到係培訓咗一班出色嘅創業家，
而參加過《全民造星》嘅Hayden係一個最好例子，近年佢將自己健身、Keep Fit同戒碳水化合物嘅生活習慣，轉化成為一盤生意，推出自家生酮食品，希望將來你嘅實體店，會遍佈18區啦！

提提各位來賓，今日喺活動唔好隨便講Sorry依個字，因為我哋其中一位得獎者，佢個名叫Sorry姐！

VIUTV真人Show《肥美人》，提醒大眾踢走肥胖偏見，而Sorry姐主打「肥美人」市場，推出大碼、同超大碼內衣，亦相當重視殘疾人士嘅需要，等佢哋唔需要再著二手內衣褲，多謝你，Sorry姐！

近一年以嚟，全球力推「元宇宙」依個大趨勢，我相信如果元宇宙令大家成日困喺屋企，成日望住個Mon，「痛症市場」一定會大爆發！而Candy亦早一人步，以中西融合嘅Concept去推廣「痛症治療」，累積嘅個案已經超過8,000宗，相當利害！

大部份朋友知道我本業係「運動公關」，一直同團隊好致力推動「運動產業化」嘅發展，所以好開心見到有兩位運動員以「創業家」嘅身份贏得今次獎項，第一位係能歌善舞、空手道運動員、有「體壇開心果」之稱嘅Jimmy，我哋一班籌委希望你一陣拎獎後，一係唱返首歌，一係跳返Part舞比我哋睇！

另一位運動員就係「包山王」Danny，近年Danny同太太Cherry大力推動攀石運動，一共有四間分店同兩間兒童攀石學校，不過我諗除咗要同你交流攀石同創業心得之外，我要請教你點解咁忙，仲可以同太太生三個小朋友，恭喜你又做爸爸啦！

最後我要多謝我老婆，其實我都唔知點解要多謝佢，但係佢話一定要喺頒獎典禮期間多謝佢。

喺依件事入面咁我學到一樣好重要嘅人生道理，做一個好老公、要維繫一段婚姻，其實同創業一模一樣，你嘅「生存意識...一定要極高」，先可以喺疫情下捱得住！

希望今日我哋嘅頒獎典禮，除咗可以嘉許努力不懈嘅創業家之外，亦都希望今日出席嘅所有嘉賓，都可以成為我哋創業互相扶持嘅兄弟姊妹，多謝大家！

」