要創造一個有公信力及為大眾所認知的獎項，一路走來，堅持多年的付出，絕對不簡單。讓我們一齊來看看「香港十大傑出創業青年選舉」 獎項創始人 溫學文 於第二屆 香港十大傑出創業青年選舉 頒獎禮上的的感人講辭:

「
各位得獎者、媒體朋友、評審團、贊助商、合作夥伴、各位來賓大家好

為了今日的Speech，我本身預備了兩個版本的講辭，一個版本需要兩位同我一齊創立這個獎項的兄弟所配合，但疫情好轉一些他們已經離開香港處理生意，所以用不著。另一個版本，寫得相當官仔骨骨，但太為官控，好像說來也沒有特別意思。不如我臨場爆肚數句，司儀們，若果我超時，可直接圈停我。

青年創業軍，我們成立了10年，呢10年大大小小的活動來計，我都數唔到大概係以百計還是已經可以以千計。大家還記不記得我們曾經舉辦過邊類型的活動? 例如好開心的 每月Happy Hour、好健康的球類活動、大時大節的Party、不同類型的創業比賽、日日見著的whatsapp生意交流群、同埋呢幾年在ViuTV的創業節目等等。

好多好多好多的活動，但其實有句心底話想同大家講，呢10年裡面包括而家我係呢個台上面，我其實一直都有好強烈的感覺，唔想再攪任何的活動!  點解呀? 大家有無試過攪活動? 唔好話好似今日呢類咁大型的商業活動，簡單點例如朋友的飯局、舊同學的聚會等等，我諗大家都應該或多或少做過攪手去攪活動。 你地覺得攪活動係咪好煩? 活動前約人夾時間、又唔覆機、又唔睇群組訊息、去到活動果日總係有人放飛機，做活動攪手真係好灰…  但大家發唔發覺，活動攪手攪場活動幾灰都好，下一次佢又會死死地氣繼續攪下一場活動，大家知唔知點解? 我有認真研究過呢個事情，最終我發現攪手去攪活動都係有個「初心」。

於是，我問返自己，點解我們要成立「青年創業軍」? 10年前的香港，幾乎係無人講Startup，我自己膽粗粗創業，屋企人反對、朋友揶揄、幾乎身邊無一個人係支持自己創業，感覺上好似哲學家柏拉圖講，係一個全黑的山洞裡面大叫，聽到的只係自己的回音，呢種感覺好空虛好無助。 所以我們創立了「青年創業軍」，將呢班空虛的創業青年，至少在創業路上有個伴，就係呢個「初心」一攪就攪咗10年….  (我諗呢10年的付出，值得大家比一比掌聲我們每一位出過力的Committee)。

除了「初心」，呢10年我都學識了「珍惜」，創業的各位都可能經歷過，身邊的拍檔、同事、合作夥伴，都人來人往，今日相識，又唔知幾時的離別。到今日，都仲有媒體引用我們過去的一個研究報告: 每100間初創企業，兩年後仍能維持經營的，只有13間。創業做生意的我們，真係今日唔知聽日事，所以我學識了「珍惜」身邊所有舊和新的朋友。

而呢幾年疫情，眼見人類身體和健康的無常，我亦學識了「珍重」， 人活著其實先係最重要。

就是這三樣東西，「初心」「珍惜」「珍重」，讓我們今日呢個獎項「香港十大傑出創業青年選舉」的出現，今日因為有同分情況，所以我們有11位得獎者，希望藉著呢11位得獎者，他們熱血的創業故事和夢想，為疫情中的各位帶來一點的正能量，以我們的夢想去觸動大家的生命，謝謝!

」